本月初出席政府地區諮詢會，慘成狼英代罪羔羊、被社民連示威者誤中副車「中蛋」嘅財爺鬍鬚曾，原來事發後唔夠幾粒鐘，猶如魚腩足球隊再中兩蛋，總計一日內「慘」吞三蛋。
識功夫都擋唔到
行會成員林健鋒噚日透露，財爺當日出席地區諮詢會後，晚上同佢及一班朋友食西餐，當時佢為搞氣氛，即場向廚房攞咗隻生雞蛋，笑笑口送畀鬍鬚曾，話：「人哋送畀你嗰隻蛋係唔完整嘅，我呢隻係完整嘅」，向來玩得嘅鬍鬚曾聽到，笑一笑就欣然接受。
原來有朋友笑鬍鬚曾，向來功夫咁耍家，點會連隻蛋都避唔開？林健鋒引述鬍鬚曾聞言後大嘆指：「我都唔知（隻蛋）喺邊度嚟」，又話粒「飛蛋」從天而降，喺毫無準備下，功夫幾勁都好難接到。
林健鋒笑言，由於見到民政事務總署署長陳甘美華喺財爺中蛋後，不斷幫財爺用蛋白「敷面」，所以當晚都有留意財爺皮膚有無靚咗，但只見佢「中蛋」右前額有少少紅。
雖然鬍鬚曾「中蛋」後自爆，「醫生叫我唔好食咁多蛋」，但據林健鋒透露，當晚西餐佢仲有食蛋，名副其實一日內慘吞三蛋。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange