毛澤東當政，政治運動、大躍進導致大饑荒、文革，死者千萬，有人將佢同蘇聯史太林、納粹德國希特拉並排，就算鄧小平都評佢「七分功、三分過」，但呢個展覽卻將毛主席包裝成98%完美，洗腦指數勁高。
餘下2%係乜嘢，就係1962年佢為建國初期錯誤同缺點承擔責任，以及指出佢發動同領導文革，但大會都係要加句話文革係俾林彪、江青反革命集團利用，負面嘢只係得咁多。喺呢個展覽，可睇到佢決定抗美援朝係保家衞國，聯同北韓同美國簽訂停戰協議係締造和平；有佢書寫「百花齊放，百家爭鳴」八個字，但亦冇提佢「引蛇出洞」搞反右運動。
唔知大會搞錯定現反諷，讀過中共史都知，毛澤東發動文革就係要整垮時任國家主席劉少奇，劉主席最終冤死，但大會竟然將佢同毛澤東一幅合照，放喺「親情友情」展板內。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange