周三另一場英聯盃8強，由剛炒掉領隊波亞斯的熱刺迎戰韋斯咸。雖然熱刺近況反覆，但人腳與實力始終勝韋斯咸一籌，加上又有主場之利，而且韋斯咸於聯賽又水浸眼眉，今役未必強陣，故熱刺的單W及[-1]的「主勝」都同樣可取。（球賽編號：星期三14；無綫網絡302台明日3:45am直播）
熱刺在上場聯賽主場吞利物浦5蛋後，領隊波亞斯亦告掛冠，今役由舒活臨時掌帥。由於舒活在熱刺多年，對球員十分熟識，今役由他領軍，相信有利熱刺發揮。另外，熱刺今役雖有中場荷西保連奴及後衞戴臣停賽，另一中場辛度雲尼亞里又因傷上陣成疑，但陣中仍不乏好手，如前鋒迪科爾及蘇爾達杜等。
有一點值得留意，是熱刺今屆於盃賽表現優於聯賽，今屆10場盃賽共取得9勝1和，其中在9場勝仗中有8仗是淨勝對手超過1球，故今役可望於主場發威，一吐上仗被大炒的烏氣。
韋斯咸護級大過天
韋斯咸近7仗僅一勝之餘，球隊目前於聯賽更排尾4，料會全力打護級戰，今役未必強陣。再者，韋斯咸今役同樣未能「夫添」，中場主力路蘭續要坐波監，而攻擊主力如中場達寧及前鋒安祖卡路爾仍倦勤，實在難看好。文：吾中
足本收睇《亂噏24》x鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24