【本報訊】多次在公開場合炮轟綜援居港七年限制的天主教教區榮休主教陳日君，對終院的判決感「好開心」，指綜援照顧窮苦者，並非保險金，不應以曾否作貢獻來量度，又批評政府帶領港人集體自私，本港可負擔綜援開支，「根本政府有能力㗎，唔係冇能力㗎，係佢唔識做咋。」
「應該畀佢哋生存」
上月初到加拿大領取人權獎時特別提到香港社會歧視新移民的陳日君，指綜援並非鼓勵人來港，認為法庭判決反映本港仍有公道，「既然佢哋有資格做我哋社會一分子，就係我哋嘅兄弟姊妹，嗰啲冇資格嚟嘅，你唔好畀佢嚟啦，我哋唔係話可以無限歡迎全世界，而係既然有資格嚟，嚟到應該畀佢哋生存。」
陳日君認為指香港「淪陷」的人缺乏理據，「政府浪費咗香港嘅繁榮，根本政府有能力㗎，唔係冇能力㗎，係佢唔識做咋。」並指要先有貢獻才可領綜援之說荒謬，「政府嘅援助唔係報答人乜嘢喎，唔係好似買保險，你出咗保險金，到你有問題可以攞番，係政府同呢個社會應該照顧啲自己照顧唔到嘅人，佢唔需要任何其他資格，佢嘅需要就係佢嘅資格吖嘛。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange