溜馬周一主場對活塞，變成兩邊勁爆前場激戰，點知主隊兩名主力保羅佐治同希拔死晒火，而活塞又控制籃板，仲有J史密夫攻入全場最高30分，最後客隊以101:96贏波，打破溜馬主場不敗金身。
活塞全場搶咗55個籃板，比主隊多15個，而且當中20個係進攻籃板，補籃得分有成22分。保羅佐治同希拔都冇乜手感，前者雖然有17分進賬，但係其實全場14射4中；而希拔表現仲曳，12射只有兩中得6分，今季場均有8.8個籃板嘅，今場只有4個籃板。最後攻入30分嘅J史密夫，喺完場前封走大衛韋斯嘅上籃，助球隊以5分之差贏波，令到溜馬慘吞今季主場首敗。
有14分進賬嘅大衛韋斯，賽後承認今場球隊輸自己：「我哋今仗完全冇準備好比賽，活塞明顯比我哋更具侵略性。今場佢哋係更好嘅球隊。」
柏加傷出馬刺輸23分
另外，馬刺同日作客快艇，柏加打到第3節同對手發生碰撞，右腳受傷要提早離場，最後客隊以92:115輸波。賽後馬刺教練普波域治話現時未知柏加傷勢有幾嚴重，剩係話愛將受傷之後連行路都有困難，所以先冇繼續比賽。
足本收睇《亂噏24》x鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24