絕世筍工又何止去澳洲做大堡礁保育員？對熱愛shopping嘅女士嚟講，有咩生活好得過日常出入名店兼唔望價錢牌揀衫？講緊嘅並非侵佔廣東道嘅土豪，而係月薪6位數字英鎊、生活同闊太無異、仲能夠以時尚名銜「造型師」自居嘅Nadia。做闊太，嫁個有錢人就可以（當然超級難），但Nadia最令人羨慕嘅地方，係掌控英超球星嘅衣櫃！
28歲嘅Nadia並非一般造型師，而係英超球星嘅專屬「買手」，不時手執20,000鎊（約25萬港元）為球星到名店入貨。一眾英超大客仔包括曼聯費蘭尼、里奧費迪南、韋碧克、前阿仙奴前鋒謝雲奴等人。身在福中不知福嘅Nadia仲透露其「甜蜜嘅煩惱」：「20,000鎊好似好多，但喺名店其實只夠買幾件新貨。」
美女仲話有次韋碧克想入手嘅Louboutin潮鞋所有分店都斷碼，不惜飛到杜拜分店。咁識do，難怪Nadia透露球星們畀tips都好大手筆，至少1,000鎊，有時仲會送名牌。不但為忙到甩轆嘅球星羅致衣物，聖誕佳節在即，Nadia仲要為佢哋搜尋禮物畀家人或另一半。吓？揀禮物都要假手於人？
所以相信呢位球星背後嘅女人，非常了解球星嘅喜好，且掌握不少秘密。雖然隊友如兄弟，但同一般女士無異，球星都怕同隊友或「同行」撞衫㗎。美貌與生意頭腦並重嘅Nadia，年前決定發展其購物、襯衫、同球星social嘅長處，成立VIP私人買手嘅小生意，喺twitter以球星效應打響名堂！文：呂晨
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24