今個月26號聖誕Boxing day係偉大毛主席120歲冥壽，內地毛左同政府大搞紀念活動，香港愛國愛黨人士當然不甘後人，噚日起至周五喺會展舉行《中國出了個毛澤東》大型展覽。
呢個展覽由《紫荊》雜誌社同韶山毛澤東紀念館合辦，駐港中央機構同香港民政事務局支持。原則上係免費入場，但要先喺入口處領取門券，點解？咪係阻止不受歡迎人士進場。「香港人優先」成員Billy仔噚日喺開幕禮開始時一刻，衝咗入會場大叫「中國要解體」、「香港要獨立」，嚇親出席人士，俾保安夾走；另一名女成員喺會場展示代表西藏獨立嘅雪山獅子旗，都被一併被趕離場。
至於展覽有乜嘢睇，大家記唔記得舊年國教風波，曾有學校帶學生參加紅色之旅，到毛主席家鄉湖南韶山，一睹佢節儉icon──一件補完又補嘅爛睡袍？𠵱家唔使去湖南，喺呢個展覽就睇到，仲有一對着到披口嘅長襪，加埋兩副戴到甩咗一邊耳柄眼鏡，就知毛主席幾咁慳家。毛主席寫得一手好字，館內放咗作品，可惜都唔係真迹；仲有唔少家書，包括寫畀身處蘇聯嘅長子毛岸英同次子毛岸青家書，不過啲字潦得幾難認。
女兒李敏撐場主禮
開幕禮冠蓋雲集，毛主席同第三任妻子賀子珍所生女兒李敏特登嚟主禮。作為紅二代嘅李敏今年已77歲，館內展示一張黑白相，係佢同父異母妹妹李訥一齊着泳衣，同毛主席喺沙灘享受日光浴。李訥就係毛主席同第四任妻子、四人幫首領江青嘅獨生女。展板有介紹話1949年10月解放軍已到咗粵港邊境，俾毛主席叫停，香港先冇被解放。嘩！真係要多謝毛主席！
mailto:[email protected]
足本收睇《亂噏24》x鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24