「野草燒不盡，春風吹又生」，意大利足球負面新聞真係沒完沒了；連一向以鬥志見稱、綽號「鬥牛㹴」嘅前AC米蘭中場加度素，連同前AC、拉素中場布洛治，涉及非法賭波，被意大利警方入屋調查；另外有4位非球壇人士被捕。唉！意甲真係多事之秋。
拉素布洛治都有份
據《意大利體育報》報道，意大利克雷莫納警方周二展開聯合行動，喺米蘭同博洛尼亞等地進行拘捕同調查工作，當中拉咗4人，部份係外圍莊家。另外，事件竟然涉及前意大利國腳加度素同布洛治，佢哋都俾警察入屋調查兼搜集證據。據報兩人涉及喺11年AC踢嘅3場比賽非法賭波，包括對拉素、國際米蘭同祖雲達斯，之後仲賭埋12/13球季嘅意乙比賽。
我求大俠就上網搵一搵，11年9月AC真係喺聯賽對拉素，比數係2:2，加度素同布洛治都分別代表AC同拉素正選上陣，不過加度素踢咗20分鐘就因傷退下火線，由雲邦美入替。有冇假波成份，警方就仲調查緊，但加度素一向係意大利同AC嘅精神象徵，不惜全場奔跑攔截，換嚟「鬥牛㹴」外號，如果連咁正氣嘅佢都打假波，真係粉碎晒意大利球迷嘅心。
加度素、布洛治一身蟻，佢哋前球會AC都唔多掂。周一意甲獨腳戲，佢哋雖然兩度落後下，憑沙柏達華倫西亞同蒙達利各建一功，主場2:2逼和羅馬，雖然拎番1分，但近8仗聯賽只贏1場，排第10位。
巴神新boot勁自戀
AC今場焦點又係「巴神」巴洛迪利，呢個意大利前鋒嘅波boot贊助商，最近由「一剔」轉去「美洲獅」，贊助商為佢特製咗對波boot，印上佢多年來經典報章報道；好似大炒曼聯後展示「why always me ?」底衫，12年歐國盃準決賽淘汰德國後講「再見，德國！」。據報「美洲獅」會量產呢對波boot，不過對鞋咁自戀，除咗巴神之外，仲有邊個咁有勇氣着住嚟踢波呢？
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24