喺上季初，冇人諗到佢會做冠軍。結果喺上季最後一戰兼最後一場，佢嘅「勁飛翔」獲勝，令佢嘅事業攀上高峰，佢就係葉楚航，亦係自簡炳墀後，近十幾年以來首位華人冠軍練馬師。鍾意熱鬧嘅航哥，暑假仲喺沙田馬場天幕亮相圈，搞咗個大型慶功宴。風光過後，今季航哥又點呢？家陣葉廐有八場頭馬，唔算太衰，但已無晒上季嘅氣勢。最慘航哥已個半月冇馬贏，連續12個賽日食白果。家陣航哥正處十字路口，究竟佢個馬房會繼續沉下去，降呢變番二線練馬師，抑或今次賽事可力挽狂瀾呢？
睇番今戰葉廐嘅佈局，似係精心部署，有唔少實力馬列陣，「大將軍」、「大寶藏」、「海嵐一號」都係今季有過表現嘅馬。其中「大寶藏」過去兩次跑谷草C欄1200米非冠即亞，絕對係路程專家。至於「海嵐一號」，今季曾擊敗「飛哥」贏馬，上仗則輸畀一班馬「步步友」唔遠得第四，可見有分量。今次「海嵐一號」潘頓唔放手，有埋個三檔，當然有良機。航哥能否走出十字路口，再向冠軍之路進發，周三晚可能係一個轉捩點。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange