狼英上個禮拜三出席港深城市建築雙城雙年展時，在場保安同公安，呀，應該係警察，為免有人真係會用隻路姆西公仔掟向狼英，於是將戒備升級，視參展藝術家如無物，實行超強封鎖，搞到有來自台灣嘅女藝術家都被當係示威者，遭保安無禮對待。
一班參展藝術家為保尊嚴，喺網上發起聯署行動，要求主辦單位建築師學會公開道歉同交代事件，否則不排除退出展覽咁話。其中一位台灣藝術家柯念樸話，當日俾保安同警察盤問，多次問佢係邊個政黨？佢多次重申自己係台灣藝術家，但就秀才遇着兵，保安唔理佢。佢話喺台灣，有自由，包容不同意見，從未發生過同類事件。
其中一位參展人陳可樂就話，如果主辦單位本周四前未公開道歉同交代事件，聯署嘅藝術家不排除退出展覽。建築師學會會長馮宜萱就話，都係因為當日有好多外國駐港總領事同深圳副市長在場，所以先加強保安啫。
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24