有80年歷史嘅永隆銀行決心飛甩老土！噚日搵來十幾位年輕嘅銀行職員，着上新制服喺中環總行舉行花生騷。雖然佢哋唔係專業模特兒，但係行起貓步依然有板有眼，就連相對低調嘅永隆行政總裁朱琦亦有捧場。
唔似國泰航空（293）搵名師劉培基設計制服，永隆邀請職訓局轄下香港知專設計學院嘅學生參加行服設計比賽，從中選出6組（櫃台職員、私人財富管理大使、孕婦、茶水阿姐、T恤、風褸）得獎作品製成新制服，成件事可以鼓勵年輕人創作，顯得更有意思。
永隆助理總經理兼零售銀行部主管鍾少權（Derek）透露，今次換制服嘅成本接近7位數字，即大約百萬元。全線43間分行，共約500名員工將於明年中換上新制服。
員工名牌 朱琦都有份
除咗換新制服，Derek仲諗到幫前線員工製作名牌，原來佢哋以前唔興呢家嘢，以後前線員工戴住名牌，同客戶溝通應該可以親切些少。Derek打趣話，反正整開，朱琦都有份。不過朱總咁高層，斷估唔使戴名牌，都大把人認得佢啦！
永隆咁大陣仗換制服，一來可能係永隆歷史悠久，畀人感覺都有少少老土，2008年被內地嘅招商銀行（3968）收購後，感覺更加強烈，所以搞搞新意思，先從制服着手，起碼畀客戶有新鮮感先，亦都係80周年慶祝活動嘅一部份。
優異作品
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange