內地首富王健林近期都幾高調，不時出席論壇或者接受傳媒訪問，講自己發迹前曾經跑咗50次銀行都借唔到錢，又話計劃同阿里巴巴創辦人馬雲合作搞電子商貿呀咁，新近又有人爆料，話佢雖然係萬達董事長，係地產大亨，但都係租房住喎。
內地傳媒對王健林嘅興趣，同香港傳媒對超人嘅興趣不遑多讓。有內地報章話，王健林每日晨早7點就返工，全公司最早到，早上8點前佢就簽晒要簽嘅文件，員工正常8點半返工就可以開始幫佢做嘢。
王總可以咁早返工，咪因為佢喺公司附近租房住囉，即使佢係地產商，都要做租客。不過爆料人士冇講王總租乜嘢房，租金幾多。
查實王健林同本港資本市場都有關連，佢掌舵嘅大連萬達今年4月買殼萬達商業地產（169）在港上市，近日供股抽水，橫掂都係玩高調，王總幾時來港會一會本港傳媒呢？
足本收睇《亂噏24》x鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24