【中環→灣仔】鄭欣宜同潮流雜誌攝影師Silas Lee撻着四個多月，戀情尚算浮面，之前又同遊布吉，月初仲齊齊去西九龍戶外音樂節朝聖睇Pharrell Williams。欣宜前晚又同男友出動拍拖，大玩雨夜浪漫，約夜晚9點幾，欣宜蹺實Silas喺中環四方街漫步攞車，警覺性極高嘅欣宜見到有傳媒守候，即放手彈開，二人急急上七人車，當時Silas心情有點急躁，開車踩行油，漠視喺車頭嘅記者，而欣宜夾喺中間大表緊張，之後校低玻璃窗同記者講咗幾句：「最緊要安全，咁樣好危險。」記者問係咪同男友飯敍，佢話：「唔係，好朋友，好朋友，真係好朋友。」
衝燈又超載
之後欣宜男友開車離開，喺中環兜咗足足半個鐘，Silas仲危險駕駛衝燈，都未能擺脫記者，之後惟有到史丹利街會合六個友人。由於二人嘅座駕係七人車，其中一個女友人好尷尬咁逼入車尾廂位置，眾人逼爆車到咗灣仔一商廈調虎離山。欣宜口口聲聲叮囑記者要安全，男友又衝燈又超載，真係要好好檢討。另外，欣宜同王梓軒噚日到九龍城出席消防安全活動，欣宜仲自爆提到同Silas駕車外出，佢說：「我唔係唔公開私生活嘅人，唔會唔畀大家影，不過希望大家小心啲啦。」佢又透露聖誕節將舉行「孤兒派對」，新男友亦會出席。
採訪、攝影：李志明、徐錦池、畢紹基、藍文浩
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24