臨近年尾，幾大發展商狂谷新盤，大家有冇留意到，信置（083）、恒地（012）、長實（001）最近推盤都搵來多位女將，唔打得都睇得咁話！
最近經常見報嘅賣樓女將，應該係力銷灣仔囍匯嘅信置助理總經理朱美儀，不過佢唔多出聲，勝在對住鏡頭夠笑容。
聞說，信置老闆黃志祥對於賣樓女將都幾有要求，例如官方發相畀傳媒，有招牌笑容之外，仲要下屬執到正一正，着得企理。遇到大時大節，好似農曆新年，下屬要着上一身喜慶顏色。下周聖誕節，難怪朱美儀要着件紅色西裝褸啦。
要講最多女將，就要數長實。負責電氣道新盤DIVA嘅曹晈明，近日就同樓神趙國雄一齊着到好有型咁做宣傳，其他女將包括何家欣同封海倫，佢哋三位都已經係阿媽級。
新加入賣樓女將行列嘅靚女就係「前新聞之花」趙海珠，佢上月加盟恒地，一返工就幫手推售北角維峯，經常傍住恒地賣樓二隊阿頭韓家輝（Mark哥）推盤。
足本收睇《亂噏24》x鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24