近日不少朋友郵電交馳，紛紛詢問蛇年團年吉日馬年開工吉日等事項，左丁山回應：「乜咁快呀，遲啲先啦。」但在中大校友日，50週年晚宴上，遇到聯合書院校友游應森，叫佢做森弟，以別何萬森叫做森哥。森弟每年慷慨捐錢俾聯合書院做獎學金，大力贊助森哥之「中大人在世界」嘅出版系列，已出版咗十六集，誠屬難得。聽講森弟在紡織界搵到錢，已經上岸，除自己聰明努力之外，曾經得過高人指點，有運就行運，有凶就避凶，故此得心應手咁講。呢次碰上佢，佢提醒左丁山：「馬年將至，年初一係一月三十一日，你要唔要太歲牌？」
哦，一言驚醒，好快就過年咯噃，唔怪得咁多人緊張問吉日，令左丁山應接不暇。經森弟提醒，馬年犯太歲者分別係馬（午）、鼠（子）、雞（酉）、兔（卯），2014年二月四日立春之日起就係馬年，因子午相沖，子年生人屬鼠，故鼠人沖太歲，特別嚴重，左丁山聞訊，連忙請森弟代購若干個太歲牌，佢話已積累咗60個柯打，多幾個無妨，一間大公司仲一手訂購七百個以上㖭，用嚟派俾伙記喎。
森弟非常熱心，天大面子請得易學會會長傅沛基先生夫婦到陸羽飲茶，向左丁山面告馬年要事，得傅太授權，可以在「G G細語」透露一啲主要內容。飲茶後再請傅會長移玉步到左丁山寫字樓詳談，內容高深，俗子如左丁山未必聽得好明白，只好做撮要筆記，組成起碼五篇文字，其中四篇由明日開始連刊四日，分別講團年吉日，開工吉日，犯太歲須知，馬年吉凶方位等，至於馬年運勢，左丁山聽到腦袋打結，要聽番錄音消化之後再整理，遲啲先至刊登。
翻查去年紀錄，蛇年年初一在2013年2月10日，本欄在1月18日寫「蛇年注意」，咁啱嘅，日期與今年差不多，兼且今個星期日（十二月二十二日）已經係冬至，講吉日吉時，時間啱啱好！