上星期五推介嘅神州數字（8255）由頭升到尾，埋單炒高近五成，但最新市值都未夠6億銀，比起IGG（8002）同埋博雅（434）嘅50幾億銀，仍有一大段距離，加上已進入冇蟹貨區，理應仲有得去。
點解市值細容易炒上？好簡單，有兩間公司，公司A市值10億銀，公司B市值100億銀，假設你有1億銀炒本，即相當於公司A嘅一成市值，但只及公司B嘅1%，要推動公司A股價肯定較公司B來得容易，亦解釋到點解總有鍾情玩細價股嘅炒家。
今日推介威高國際（1173），同神州數字有異曲同工之妙—在行業中屬於細市值一族。威高國際主要有兩瓣業務：一為時裝，二為化妝品。後者近年發展迅速，成為主要盈利來源。最新中期業績顯示，化妝品溢利達2,092萬銀，按年狂升97%，佔總額近94%，儼然一隻化妝品股。事實上，旗下Colourmix店舖數目已達70間，平均每宗銷售金額亦升4.9%至323元。威高國際最新市值7.6億銀，相比莎莎（178）及卓悅（653）分別248億銀及52億銀，絕對符合細細粒易炒上要求；市盈率13.5倍，亦較同業平均平足一半，上周五突破三角形走勢，一旦升穿今年高位0.395元，要見0.5元絕非夢想，到時市值都只係11億鬆啲！
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange