佳叔自退下中策組首席顧問一職後，沉寂咗大半年，近排又再度活躍起來，吓吓都隊住梁振英而來，最近佢又出嚟吹，表示特首上京述職要規範化，呢個講法始於中聯辦新坐館張曉明。香港傳媒、泛民冇乜反應，因為大家都討厭梁振英，如果北京中央出手，每次述職都訓斥佢一餐，至少為香港人出啖氣。但從高度自治角度而言，特首述職規範化，未必係好事，此舉可能係北京對香港實行micro management之始。
規範化後難避重就輕
三任特首之中，自治程度最高係老董，佢同老江有交情，可直接打電話去中辦，根本就唔使港澳辦及中聯辦，佢老人家述職就真係兩手空空吊吊揈，一味務虛靠吹，去到第二任北京官員已有怨言，認為佢述職太過relax。其實老董未必錯，述職應該係禮節性見面，務虛唔務實，大家交換對大形勢睇法。
到咗煲呔，吸取咗老董兩手揈揈教訓，刻意在述職時扮乖仔，以其盡皆過火之演技，在主席面前扮矮仔小學生，攞本簿出來抄筆記，以示自己專心聽取中央意見。大佬，同領導會面會有逐字紀錄使乜鬼抄，擺到明就係賣乖，而佢述職內容已比老董有內容，實質得多，由務虛大形勢到政治、經濟、社會議題都有，但述職內容主動權仍在特區這邊。
到咗689，似乎更加有個框框，由中央規定特首要報告乜嘢，而非特區呢邊主動報上去就得，呢一步反映中央有幾信梁振英，套用林鄭金句，三個字：「不言而喻」。特首述職規範化，即係北京出題，特首回答，出題者當然唔會係習近平、王岐山、李克強，可能係為北京出謀獻策嘅港澳研究會，如果係咁，梁振英就好難避重就輕，隱惡揚善，spin中央。
好似問到同建制派各政黨關係時，本來可以亂吹一番，表示各黨均支持我梁振英。但同一時間，北京根本知道梁振英已下達封殺自由黨命令，禁止官員出席自由黨黨慶，令平時在立法會要拉票，好多時靠自由黨過關嘅商經局局長卡片蘇兩邊不是人。中央要你搞大團結，你就背住中央搞超級小圈子，仍停留在梁唐之爭時代，將建制派撕裂再撕裂。
梁振英述職時，敢唔敢講大話spin中央呢？當佢敢，亦要擔心穿崩被揭穿，如此規範化述職，仲有一道撒手鐧，就係對中央交予之工作，要作階段匯報，明確交代落實執行情況，冇得求求其耍咗去。就好似董事局𥄫實CEO交數一樣。梁與董一樣，一味務虛吹水，對執行細節毫不掌握。
即使帶一大棚官員北上述職，為自己壯膽兼卸定膊，但今後都好難再耍中央。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange