下星期就係聖誕節，為方便同事放假，各大機構提早喺呢兩個星期舉行聖誕派對或周年晚宴。金管局上周三就喺中環美心酒樓舉行周年晚宴，有500幾名員工參與，適逢金管局成立20周年，總裁陳德霖（Norman）親自頒獎畀服務20年嘅老臣子。
金管局製作咗一批仿水晶、內附印鈔廠碎鈔嘅紀念膠座，頒畀服務20年嘅資深同事，有廿幾名老鬼攞獎，其中之一係掌儲備管理嘅副總裁余偉文，另一位副總裁（貨幣管理）彭醒棠，就因為94年1月才入職，差一個月先可獲殊榮。
明年9月底約滿
陳總喺台上，特別勉勵呢批差少少就攞獎嘅同事，叫佢哋唔好灰心，「下年輪到你哋」咁話，因呢個服務獎將會繼續頒授。
陳總明年9月底就五年約滿，近期外間唔少有關佢去向嘅傳言，例如「被出選」特首，陳總向來滴水不漏，喺周年晚宴咁公開嘅場合，當然冇透露半句風聲。至於「下年輪到你哋（攞獎）」呢句說話，冇前冇後，好難解讀到明年仲係咪佢頒獎喎。
點解大家會細意解讀陳總喺周年聚餐嘅一字一句呢？事關08年底，前總裁任志剛喺周年聚餐上，對住400幾位同事發表祝願辭時，忽然自爆「除非有奇蹟……如無意外，會（09年）9月離開」，將政府外洩一年嘅退休消息，親自拆彈。於是大家咪好留意陳總言行囉。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange