【溝酒瀨嘢】杜汶澤為拍電影《豪情3D》操到變大隻佬，飲食要好節制，捱到部戲拍完，當然要放縱一下。前晚阿澤約埋成班老友出街食飯，包括陳淑莊、前新聞主播柳俊江等，阿澤喺facebook留言話陳淑莊見到枱面支茅台好驚，佢自己就留言：「I'm so fxxking drunk！」
撞咗威士忌
然後時間一轉，噚日朝早阿澤再次喺fb留言，但飲醉似乎唔係陳淑莊，而係佢自己，不停反問朋友：「點解我會瞓咗喺廳㗎！邊個送我番泥（嚟）㗎！做乜咁㗎？」
有人話阿澤前晚嘅情節精采過《醉爆伴郎團》（The Hangover），柳俊江插嘴話：「實情係好笑過Hangover……你重複講咗十次：柳俊江係咪好靚仔先？」
阿澤之後再貼咗張俾班friend抬住走嘅相，睇個樣真係貓得好緊要，有朋友留言：「飲埋嗰啲臘腸味嘅酒就係咁！」阿澤答：「關鍵係撞咗威士忌。」
場主：守庫
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24