呢排好多投行籌款賀聖誕，大摩上周四搞完籌款唱聖詩，瑞銀翌日大玩角色扮演，各部門再諗計籌款。于正人（Johnny）同李靄欣（Anita）帶隊嘅衍生工具部，先搵個花樽周圍向同事募捐碎銀，再以畀錢競猜方式，估個花樽有幾重，全日籌得1.5萬元。
Johnny個部門今年以「會買窩輪嘅人」作扮嘢主題，即係乜人都有，制服誘惑組有空姐、警察，歷史人物組就有牛仔、印第安人，集團亞太證券聯席主管Taichi Takahashi就扮《星戰》中嘅角色。
Johnny可能睇得電視多，扮外科醫生，套衫喺淘寶淘番來，100元人仔搞掂。佢仲做戲做全套，影親相都舉起雙手，扮外科醫生洗完手準備做手術咁款。「明燈」沈大師喺面書睇到佢啲相，忍唔住問佢有冇鎮靜劑，因為佢買咗好多瑞銀牛仔喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange