雲格（圖）絕對唔係英超最型英帥嘅領隊，但肯定係全英超着衫最具標誌性。呢位阿仙奴主帥嘅長風褸造型，同佢一毛不拔嘅形象一樣深入民心，堪稱英超「長褸王」；正如多蒙特教練高路普，亦係球壇「眼鏡男」嘅表表者。不過今夏新加盟英超嘅曼城領隊比歷連尼，上周六對戰竟然做copycat，喺主場抄襲「廠長」嘅長風褸造型抗衡，最後仲大勝6:3。
雖然比帥着上長褸後，曼城如有神助，但廠迷同傳媒對雲格一成不變嘅長褸打扮，一向都不敢恭維。的而且確，無論英超抑或其他聯賽，都甚少領隊會揀着呢件「米芝蓮」褸，就算有，都冇雲格着得咁有話題性。所以唔少球迷都嘲笑雲格呢個標誌性造型。
早前球會喺網上發起問答活動，就有球迷針對雲格件風褸搞爛gag：「你有冇諗過試吓唔拉拉鍊？」、「你今個冬天係咪都會着住佢過冬？」，可見球迷有幾討厭呢件被嘲為極似睡袋嘅長褸。球迷之間仲流傳，呢件褸簡直係不祥之物，皆因今年3月作客不敵熱刺，雲格正好以長褸造型現身；而之後嗰場作客拜仁，法國人一唔着就贏波喇！
雖然長褸王嘅fashion sense只得到比帥認同，但雲格咁多年都堅持自己，呢種堅忍、慳家同「忍辱負重」嘅美德，抄到個造型，都抄唔到個氣質。文：呂晨
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange