【銅鑼灣】陳靜（DaDa）之前玩失蹤，喺微博單方面宣佈退出娛樂圈，結果唔使3個月又話復出，真係玩殘好多人！DaDa聲稱患有情緒病，要食抗抑鬱藥搞到嚴重水腫，有傳佢體重暴升20磅，高峯期近130磅，以𡃁模嚟計真係超晒磅，難怪DaDa之前話復出第一件事係要努力減肥。
收埋牛肉乾
不過DaDa復出後工作量唔算好多，上月出席聖誕亮燈後，據悉要到下個月先再同杜汶澤拍新片。閒來無所事事嘅DaDa，前日下晝4點幾就同一個女性朋友喺銅鑼灣行街，DaDa着咗件白色衞衣加灰色運動褲，唔知係咪條褲太貼身，搞到佢巨躉現形，似乎收身進度一般。DaDa日光日白戴住黑色冷帽同墨鏡，唔少人都對佢眼望望，DaDa由崇光走向糖街間卡拉OK方向，途經一間便利店仲買咗支烏龍茶。
入咗卡拉OK之後，DaDa個朋友先去櫃枱攞房，而DaDa就企埋一邊等人帶上房，短短幾分鐘，DaDa表現得好唔耐煩，不時撥頭髮，仲忍唔住由膠袋裏面攞起包牛肉乾想拆開嚟食，但見有職員帶上房又急急放番入袋，表現狼狽。其實卡啦OK有規定唔准帶其他食物入內，但DaDa就犯禁，除咗自備飲品、牛肉乾外，仲帶埋一盒士多啤梨，真係識食。
採訪、攝影：梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！