據講近期市面出現咗一批新種類球迷，名叫勝利球迷，呢班朋友仔一出現啫，就引來各方嘅大肆抨擊，話佢哋輸打贏要，見高拜見低踩咁話。查實呢，追求勝利嘅興奮人之常情，將快感盡量放大兼延長亦係人之本性，所以我一啲都唔抗拒呢一班勝利球迷，仲幾欣賞佢哋變臉嘅灑脫爽快㖭。
只不過勝利球迷們可能都係初初墮入足球圈呢個陷阱冇幾耐，有啲嘢佢哋未係好清楚。咁嘞，今日就由叔叔為你哋來一堂球迷經濟學。查實呢上帝好公平嘅，無論你捧邊一隊都好，贏波多嘅定係永世唔贏波嘅都好，一季流流長之後，大家嘅開心指數其實唔差得幾遠，分分鐘最後排17嗰隊啲fans仲開心過排第7嗰啲㗎。
條數係咁計嘅：
球迷開心指數=（滿足感–挫折感）x期待指數
嗱！先講滿足感，即是話一場波嘅勝利，你可以得到幾多滿足感，唔使講正常贏一場波最高嘅滿足感，就應該係100%啦，就正如你喺熱辣辣嘅夏天嘅第一杯雪糕，仲要係Lu Lu請你食嘅，咁梗係大滿足啦！不過當你贏吓一場贏吓又一場，贏波係應份過哨牙蘇入波嘅時候，你嘅勝利滿足感係會越來越低嘅，不過睇波點都好過食雪糕嘅，我又未見過有球迷贏波贏到嘔。
嗱！以上講嘅就係邊際效應遞減定律嘞！相反萬一你隊波係久旱逢甘露嘅，咁你每場贏波嘅滿足感就梗係爆錶啦。
至於挫折感呢，強隊偶爾失1球嘅挫折隨時慘過包尾嘅連輸3場，你睇阿仙奴輸1場歐聯嘅打擊，真係慘過你話畀新特蘭班球迷知，佢哋要降班！
好嘞，期待指數係會將你所得到嘅嘢加倍奉上嘅，所謂期望越大失望越大，唔怕話你知，我眼見大部份勁旅嘅粉絲嘅EQ都好差，反而弱旅呢，啲脾氣好到不得了，啱晒做朋友。
勝利球迷們，開心指數呢味嘢，同排名係冇直接關係㗎，唔係嘅話，你試下支持韋斯咸。經常捱餅，但偶爾飽死，好過癮㗎！
KEYMAN
now TV主持
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24