【銅鑼灣】現年43歲嘅洪欣同現任老公張丹峰結婚4年，終於造人成功，𠵱家個肚已經有8個月，前日下晝4點幾，大肚洪欣去咗銅鑼灣利園睇BB嘢，有個中年女人陪佢行街，洪欣雖然臨盆在即，但個肚都唔算好巨，着住平底鞋嘅佢行動仲好敏捷，一啲都唔似普通孕婦咁論盡。
數次打噴嚏
不過，前日洪欣好似有啲作病，其間見佢有幾次打噴嚏，但洪欣都冇戴口罩，相信情況唔算嚴重，希望佢小心保重身體。洪欣行街時專攻粉紅色BB女衫，佢肚裏面嘅應該係B女，可以同莫少聰所生嘅囝囝湊成一個「好」字，洪欣睇中咗一條粉紅褲仔，仲用手機影相，唔知係咪問老公靚唔靚呢？
洪欣同中年女友邊睇邊傾，不時問女友人：「買邊件衫好呢？」最後佢哋行咗成粒鐘，但都冇收穫空手而回，其間洪欣收到友人來電約食飯，洪欣話：「唔得呀，老公唔喺香港。」所以佢要趕返屋企湊仔，果然係好媽媽。
採訪、攝影：畢紹基
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013