路姆西繼續發酵。第一屆路姆西飛行大賽，假如參賽者比渣馬更多，肯定有第二第三屆。路姆西識飛，勁過李飛，繞過提名委員會，做特首N屆都掂！
瑞典品牌毛公仔，一夜間變特區神獸，完全百分百外國勢力介入，甚至做埋國際新聞主角，香港的國際地位，無可代替。路姆西上國際版，騎呢搞怪，總好過模特兒在上海戴口罩行catwalk的陰霾照片。兩害取其輕，路姆西，丟極有個譜，唔會攞你命嘛，問駱家輝寧願被丟路姆西，抑或急急辭職返美國緊急換肝？
不過，別被假象沖昏頭腦，這頭狼公仔，在年尾流流被丟，不偏不倚，雞蛋誤中副車，公仔在飛行途中正好跟特首交叉在一起。記者拍到的照片，後者笑容燦爛得不尋常。陰暗地推測，路姆西爆紅，是梁營背後策劃，以路姆西埋尾，榮登年度人物榜首。路姆西搶鏡，丟極都是零殺傷力，對民望長埋堆填區的梁營來講，路姆西暫時拯救了團隊，讓梁營的摺凳，過渡到2014，不致年尾香。