女姐病逝，戲迷同聲一哭，就連新馬師曾遺孀洪金梅（祥嫂）和已故名伶鄧碧雲的女兒雷靄然，亦深感突然和惋惜。
祥嫂昨接受本報電話訪問時，指女姐未返回內地居住前，跟祥哥合作無數，至93年祥哥與女姐為香港電台舉行的《萬千希望在人間》活動擔任嘉賓，二人再度攜手演出《胡不歸之慰妻》，雖然二人事隔數十年再度合作，但仍相當合拍。祥嫂說：「佢兩個都咁高深藝術，資歷都係咁豐富，一拍埋去冇話覺得咁多年冇合作，大家都好熟練，喺藝術上發揮都好受讚賞㗎。祥哥生前都讚賞女姐聰明伶俐，女姐未返內地之前，祥哥好多時都同女姐拍檔，舞台上合作演出，係一對好拍檔嚟。女姐藝術上好難得、好優秀，對晚輩有所提攜同幫助。」
住家湯水滋潤
女姐離世，祥嫂表示相當突然：「嚟得都好突然，佢不嬲身體都唔好，好單薄。終歸年紀大。我好讚賞佢意志力好高，難得佢晚年仲唱得、做得，周不時嚟示範演出！聽到消息個心唔舒服啦，覺得好可惜，唔捨得都冇辦法，都80幾90歲，祝福女姐一路走好啦。」
鄧碧雲女兒雷靄然從小藉着母親關係跟女姐認識，她說：「我叫佢女姨，當我長大咗接觸佢就係93年《萬千希望在人間》，港台同廣東人民廣播電台合作，當年我做導演，李再唐監製。女姨係好嚴肅好認真同好投入，畀我最深刻印象，佢唔講嘢嗰陣會humming，喺架車度不停咁『哼』，我問女姨點解，佢話咁樣係練氣同練聲喎。」
雷靄然還談到女姐有一習慣，就是日日要飲住家湯：「佢嚟香港嗰陣講明一定要日日有湯，冇講係乜嘢湯，但要煲定湯畀佢。我仲記得因為呢個湯唔見咗我個水壺，個水壺係我阿媽留低嘅紀念品，唔知係邊個唔小心，後尾搵唔番，我係好depress，因為我媽媽91年唔喺度！女姨走，我都好突然，完全冇諗過，好欷歔，所以做人真係要珍惜眼前！」
採訪：戴彩煥
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013