本地老牌勁旅愉園今季重返甲組，開季打咗8場波仲未贏過，聯賽榜7戰得1分排包尾，教練都換咗兩個，總監又被架空，最新仲爆出炒外援，華將減薪嘅負面消息。綽號快活谷（Happy Valley）嘅愉園搞成咁，呢勻真係變咗unhappy valley囉。
部份華將減薪一半
今季以乙組亞軍升班嘅愉園，季前吸引唔少贊助商支持，首季班費揚言有500萬港元，總監鄺曉明季前仲好肯定咁講，重返甲組首季要爭前4，問佢點解咁有信心，佢話加盟外援全部好有份量，好似艾斯入選巴拉圭國家隊，前鋒亞巴沙姆踢過阿甲，其餘塞爾維亞門將保素域斯又踢過歐聯外圍賽，加埋高頭大馬嘅克羅地亞中堅沙沙麥斯，同埋非洲歸化兵賓曹同阿古沙，夾住班唔算太差嘅華將，照計有一定戰鬥力。
點知快活谷打咗3個幾月一場波都未贏過，教練都由前沙士菲青年軍教練沙治奧換咗科士打，後者教咗冇耐，因不滿有人干擾排陣而劈炮；之後總監鄺曉明話因私事冇時間處理隊務，據講實際係俾人架空，負面消息真係一單接一單。近日就傳出球隊隨時爛尾㖭。
曾經做過天水圍飛馬副領隊嘅盧冠銘上星期入主愉園做副領隊，對於有傳新領導層要求部份本地球員減薪一半，外援就全部唔要，佢噚日澄清話愉園冇財政問題，球隊成績唔好，換教練同球員好正常，有球員要減薪，但同時都有球員加薪。對於有傳愉園借兵救亡，佢話：「球隊唔會考慮，友會借得出嚟都唔會太好，而球會正計劃搵新援加強實力，希望下半季戰績有改善，保住甲組席位。」
外援思鄉要離隊
問到隊內外援去留，佢話：「隊內有歐洲外援同球會講過因為思鄉，想同球隊解約回鄉過聖誕，至於其他外援去留仲要研究。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange