隨伯南克離職日期近，噚日外國傳媒報料，奧巴馬想搵以色列央行前行長費希爾（Stanley Fischer）做聯儲局副主席，做下任主席耶倫嘅副手。現年70歲嘅費希爾喺政經及學術界地位崇高，當年喺MIT任教時，儲局主席伯南克及歐洲央行行長德拉吉亦係佢學生，佢同董布殊（Rudiger Dornbusch）早年合作編寫嘅《宏觀經濟學》洛陽紙貴，唔少本地學子應該讀過。佢1988年離開象牙塔後，曾做過世銀首席經濟學家、國基會副總裁等要職，實戰經驗豐富，過去八年做以色列央行行長，攞過全球最佳央行行長榮銜。以佢嘅人脈及傾向鴿派嘅作風，同耶倫有望組成強勢領導，延續伯南克緩步收水嘅路線。
花旗國上個禮拜五公佈11月新增職位達20.3萬個，高於市場估計嘅18萬份，美股當日埋單漲近200點，歐元及澳元等貨幣無視儲局退市威脅走高，反映市場risk on是也，道聽塗說嘅原因，係數據反映當地經濟越來越勁，就算退市亦冇有怕。不過，三日後，當三位聯儲銀行行長都暗示儲局下周可能退市，市場卻忽然驚青，美股周三跌過百點，美元兌上述貨幣則各行各路。
有專家做過統計，指聯儲局喺過去30年嘅12月，曾經13次調整利率，當中9次係減息，加息就只得4次，而喺1988年、2004年同2005年嗰三次，息口原本已經處於上升周期，淨喺得86年嗰次屬於加息周期頭炮，由此觀之，儲局免得過都唔想喺年尾收水，影響年尾嘅聖誕老人升市（Santa Claus rally）。
不過，統計係死嘅，最重要喺配合市場形勢，記得幾個禮拜前講過，5月以來，市場情緒雖然追隨儲局高層嘅長官意志擺動，但伯南克對年尾開始收水、出年年中散band嘅立場冇變過，加上11月新增職位超預期，就連國會兩黨班冤家，早幾日亦傾掂未來兩年嘅預算案，避免10月初嘅政府局部關門事件重現，為儲局造就退市條件，儲局下個禮拜象徵式收水，酌量將每個月850億美元嘅買債規模縮細，測試市場反應亦合晒何車。
央行定調 紐元值博
經過過去半年嘅猜謎遊戲後，市場對儲局退市已做足心理準備，就算儲局真的退市，美元後市升定跌，關鍵在於市場視退市為好消息定壞消息炒，即係市場情緒主導，加上臨近年尾匯市交投較稀疏，個市隨時好chok，盡量避開美元，玩其他交叉盤算了。
本欄上周建議冷吼加元，結果加元之後連續五日反彈，可惜美元兌加元升唔到去1.075，未能成功開倉。本欄喺8月時曾以「持力奇俠」形容紐元兌澳元交叉盤嘅升勢，唔經唔覺，紐元兌澳元已由當時嘅0.88升到噚日嘅0.9186，創五年新高，加上新西蘭央行行長Graeme Wheeler噚日定調話出年加息，照睇呢個交叉盤應該仲有得去，就算升唔到去1算，締造「交叉算了」神話，取得階段性成果，贏餐飯應該唔太難。
奇兵
本欄逢周五刊登
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24