相比起前兩屆，曼聯、曼城同車路士都試過分組賽出局，今屆4支英超隊都可以出線16強，睇落進步咗唔少。不過講到爭冠軍，睇嚟都難啲。
今季嚟講，氣勢最強嘅英超球隊梗係阿仙奴，但將佢同拜仁、皇馬同巴塞3大巨頭秤一秤，始終差啲。最弊嘅係，阿仙奴嘅風格同呢幾隊大熱門相似，但球員質素就差啲，高下立見。阿仙奴𠵱家次名出線，16強真係極之難踢，加埋阿迪達呢場拎咗紅牌，首回合停賽，冇咗呢位中場指揮官，兵工廠轉守為攻嘅效率會弱咗。
摩佬多計仔
講到打盃賽，小弟覺得車路士可能仲好過阿仙奴，領隊摩連奴出名戰術勁，當佢哋面對強隊時，摩佬應該諗到計仔頂住，加埋車仔嘅風格夠晒硬朗，係巴塞同拜仁呢啲技術型球隊嘅剋星，有少少格食格嘅優勢。不過，今日呢隊車仔少咗一份穩定，竟然可以喺分組賽被巴素利雙殺。有啲遇強越強，遇弱越弱嘅感覺，分分鐘會俾啲辛尼特之流搞掂。曼城同阿仙奴嘅處境一樣，次名出線對強隊。曼聯就唔使多講，英超中游嘅中場線，加一個英超中游嘅領隊，過到16強都過唔到8強。
今季英超鬥得咁激，阿仙奴、車路士同曼城爭冠軍，唔可以全心全意爭歐聯，而曼聯就要同熱刺、修咸頓嗰啲爭前4，仲更加唔得閒。歐聯？大家都係顧掂聯賽先講啦！
文：咖喱
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24