龍頭科網股正在回氣，但二三線同業卻炒個不亦樂乎，網遊股博雅（434）及IGG（8002）相繼破頂，上市時非市場焦點嘅神州數字（8255），噚日亦終於開車，挾着三大優勢下，絕對有力由冷轉熱，喪炒一餐。
首先，神州數字業務夠獨特，其擁有自家開發「神州付」系統，網遊玩家可透過手機充值卡為賬號充值，變相將手機話費及網遊充值服務互通，大大提高玩家充值意欲及靈活性，內地500多家網遊運營商，皆為神州付合作夥伴，當中包括騰訊網、新浪、百度等，現時每日透過神州付充值網遊賬號金額為440萬人仔，即一年超過20億港紙！由於神州付只需提供平台，成本肯定不高，利錢十分豐厚。
第二，集團去年推出網遊評論網站「遊戲瓶」，讓玩家可就遊戲評分，以及互相交流心得，唐牛亦瀏覽過，發現接近一半版面已遭網遊宣傳廣告侵佔，其吸金能力可想而知，假以時日，絕對有分拆上市條件。
第三，公司是次配售1.2億股，佔擴大後股本25%，管理層及兩基金揸貨共75%，另包括遠東控股（036）在內兩名基石投資者，共持貨約6%，計埋部份長揸客，意味流通股數只有幾千萬股，要炒上可謂易如反掌，噚日大升14%後，市值仲未夠4億元，從任何一方面睇，都係可造之材。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange