喺中環交易廣場對開嘅一對銅牛歸位了，經過補妝仲靚仔晒，港交所（388）嘅交易大堂喺交易廣場裏面，重獲呢對銅牛守護，港股會否有運行呢？
交易廣場業主置地喺2011年底開始重建富臨閣（The Forum），由5層增建為7層，渣打銀行舊年落實租用全幢大廈，作為渣打大中華區嘅私人銀行中心。
重建期間，呢度一直圍晒板，華華噚日經過見到大部份圍板已拆除，之前拎走咗嘅一對銅牛，同埋台灣著名藝術家朱銘嘅太極系列藝術品亦已經擺番喺度，可能因為富臨閣重建後，成間玻璃屋咁，太極系列同兩隻銅牛襯落去，感覺比以前醒神。
聽講一對銅牛前晚先至擺番出來，對牛之前經歷風吹雨打，氧化得幾厲害，經過補妝後，𠵱家又黑又令，希望佢哋帶挈港股一樣咁靚仔啦。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange