楊明綸靚唔靚仔？見仁見智啦！不過佢就肯定溝死女，楊明綸女友上個禮拜三入馬場，公開宣示主權。好多網民都驚為天人，心入面彈出「羨慕」兩個字。據知楊明綸女友叫姓Cheng，曾經喺有線做過客串主持。綸仔除咗愛情得意，事業都唔錯，今季贏咗13場頭馬，係成績最好華將，日前仲入選角逐騎師賽㖭，風頭更勝蔡明紹。呢位靚仔騎師今期同靚仔合作，就係沈集成隻「好靚仔」。
「好靚仔」當然唔可以溝死女，但就可以砌低敵人。隻馬賽績有幾勁？今季一出就跑贏「榮耀假日」，上仗再次跑贏「榮耀假日」而同「駿馬名駒」串Q。「榮耀假日」之後兩戰全勝，而「好靚仔」其他蹄下敗將「怡昌之星」、「魅影蹄飛」、「好健康」等亦相繼勝出。呢啲咪靚仔賽績囉！
禮拜日「好靚仔」養精蓄銳再跑五戰得三冠兩亞嘅1400米，數據上唔可以唔揀。動態方面，楊明綸同「好靚仔」彈閘後，與沈集成係咁傾，亦有晒搏殺手影。唔知靚女Miss Cheng到時會唔會去馬場，為佢心目中嘅好靚仔打氣呢？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange