博士L得閒無事，又約左丁山吃午飯。呢次唔去名人坊嘞，改為去尖沙嘴K11商場凱悅酒店中菜廳凱悅軒，原來呢度有「任食」餐單，每位收費二百五十元，博士L話費事點菜咯，就試吓「任食」啦，食到你夠為止，其實中午邊度食得咁多吖，埋單計算都係酒店方面佔着數。
博士L帶咗兩位朋友嚟介紹俾左丁山認識，其中一位係在中大環球商業系畢業嘅年青iBanker，做緊分析師（入行第一個職銜），讀得呢系，想必係讀書尖子，問一問，果然係名校出身嘅，會考十A狀元也，點解佢又會識得博士L呢？係環球商業系教授W帶學生出中環搞networking，增廣見聞，因而遇上嘅。商科教授在中環推銷學生，本是中大MBA課程嘅傳統，想當年，博士L在中大讀MBA（冇畢業）時就有John Espy教授非常熱心，不斷在中環走訪美資銀行、美資跨國公司，介紹中大MBA，為學生在中環打開局面，學生對佢好感激，懷念至今，陳志輝教授（中大EMBA課程主任）就係Espy學生啦，想唔到今天仍有教授肯傳承呢個良好風氣。
博士L另外一位朋友係補習天王L，上述那位尖子P就係佢嘅學生，據天王L講，不少名校學生自小跟佢做私人補習（不是大班補習），尖子P自小學五年級就跟佢跟到入中大，佢有不少學生入咗劍橋、哈佛、港大等等。唔補習就唔得？左丁山有此一問。補習天王話：「咁又未必，其實好多跟我嘅尖子，家庭背景多數好好，父母督促佢地讀書仲緊張過我，我只係提供讀書方法、考試竅門，如何有效率地讀書考試等等，呢班叻學生識得自動搶韁向前衝嘅啦！」補習天王經營補習社，亦有本難唸的經，要招收多啲學生必須在地鐵上落方便嘅商場設分社，但租金不斷上升，一啲面積萬零呎嘅地方要交成一百六十萬元租一個月，為了慳租金，不斷遷址，每每損失大量裝修費，都幾慘情。依家讀書考試制度同有會考、高考時期有好大不同，與左丁山讀書時更差天共地。尖子P話有一科甚麼校本課程，無論在校老師或補習社都會教佢地上網攝取資料，但要「整理得好醒目」，唔好俾考試局捉到抄襲，全港風氣如此，教育局/考試局都無法禁止嘅嘞！