有這麼一個故事，話說曼德拉一朝由民權領袖躍升為南非首位黑人總統，名氣和影響力聲價十倍，待遇自不可與昔日作為監躉時同日而語。各地知名人士紛紛送禮致賀，其中有一份瓷器餐具，曼德拉只看過一眼，之後就原封不動從來沒有使用過。好，問題來了，現在曼德拉身故，你認為那批瓷器算不算是他「遺物」的一部份？基於以上假設，某天有人將那份瓷器轉贈給你，你還覺得有價值嗎？你又如何知道真偽？
故事由此伸延到近日有關李小龍遺物的拍賣，話說各地民間流傳着不少和李小龍有關的物品，當中以支票和信用卡存根等最為搶手，因為有他本人簽名字樣所以身價暴漲，但質素良莠不齊，亦有渾水摸魚成分。講龍哥沒多少個專家，但想買龍哥遺物，「較信得過單位」則惟有幫襯「龍婆」，唔係羅蘭，係蓮達，即李小龍老婆。皆因龍婆有儲物癖好，舉凡龍哥生前大小事項、物件，都鉅細無遺一一收藏，以至每次推出龍哥遺物拍賣都牽起哄動，加上有蓮達本人以遺孀名義簽發證書，明買明賣，有根有據。
近日舉行的李小龍遺物拍賣創下共二百多萬港元成交價，當中最矚目自是據說是龍哥在最後遺作《死亡遊戲》中所穿着的黃色連身戰衣，更以65萬港元成交，值得與否，見仁見智。是次拍賣物品主要來自不同擁有人，當中部份均附有李小龍首徒木村武之的證明簽署，咁都信唔過？
親身驗證
當然，出嚟行講個信字，假使有日龍婆攞條底褲說是龍哥遺物，有證書，冇相（梗冇㗎啦），你冇得揀惟有信佢，就算你覺得被搵笨亦可以大條道理找佢晦氣，皆因有佢認頭，作為龍哥最親近的人，冇人可以「叉卵廚」佢，因為應該冇幾多人真正見過龍哥條底褲。但黃色戰衣是戲服，遺下多角度拍攝的片段、相片不勝枚舉，當中從顏色、剪裁、以至質料都提供了較可信的參考條件，以我等對李小龍影片參詳無數的癡漢，再加上親身對該批「遺物」進行過驗證，是龍抑或蛇自是心裏有數。換個角度去分析一下，就等如在某著名珠寶店櫥窗看上一塊翡翠，價值不菲，但行內人拿上手便知那是經硫酸浸染，改變了質量的A貨、甚至可能是B貨，不知就裏的客人花錢買下心頭好，以為執到寶，其實花得冤枉。知名店舖都會魚目混珍珠？當然亦不能抹煞名店買辦被人蒙騙入錯貨之可能。
講咁耐，即係啲「遺物」係堅定流啫？
我答你：係堅嘅，不過……
吊吓大家癮，欲知後事如何，等一個禮拜啦。
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013