久休復出的劉小慧，最近以友情價復出作新嘗試，今次她將會為製作自家節目、有「復活」迹象的亞洲電視主持節目《BB日記》。節目將於後晚8時30分播出，另於明日在銅鑼灣舉行大型宣傳活動，屆時會派100包尿片及50罐奶粉。
小慧日前到亞視總台錄影節目，雖然今次是小慧首度做主持，不過見她毫不怯場，與另一主持劉子葱頗有默契，甚少NG。問到今次有否壓力？小慧哈哈笑說：「完全係零壓力，反而覺得好開心，今次同以前唱歌唔同，以前係搵食，𠵱家係有興趣先出嚟，想同大家分享經歷。我諗𠵱家最hit嘅話題都離唔開生B同湊B，好多媽咪一行埋就講湊B嘅嘢。」
小慧又說：「呢個節目完全係我想講嘅嘢，係一啲親身經歷，有啲剪片朋友睇咗都覺得好得意。其實咁多年邊個台都冇呢類節目，我都有問過亞視點解會做，佢哋話想用呢個節目省靚個招牌，所以事前大家嘔心瀝血做咗好多資料搜集，我好感恩撞到一班有heart嘅人一齊做。無論收視係點，我相信效果一定唔會差，唔會俾人鬧爆，希望可以吸納啲後生觀眾，已經叫贏晒。」
獲老公支持
再問到收視方面，小慧說：「最緊要係呢個節目有人鍾意，有口碑已經好開心，當然bonus係可以打破以往收視。我老公（蘇志威）都好支持我，佢知道我做每樣嘢都有原因，目的只係希望做件事令自己開心。如果真係開第二輯，我都唔介意繼續做。」
採訪：何慧斯
攝影：黃文偉
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013