【中環ifc】已經好耐冇喺幕前演出嘅46歲陳加玲，早前佢做訪問時話會投資億元做製作人拍愛情片，似乎佢𠵱家泊到好碼頭，唔做幕前而轉居幕後，不過佢嘅大製作暫時只聞樓梯聲，可能未有動靜關係，所以佢就專注拍拖，享受吓感情生活先。
專注拍拖
日前晚上8點幾，一身便服、頭戴cap帽嘅陳加玲與一名高大外籍男現身中環ifc，由於外籍男比陳加玲高出成個頭，所以佢哋並排而行嘅時候就惹來途人注目，陳加玲與外籍男有傾有講，佢又不時蹺實外籍男手臂，好不親熱。
不過完全冇化妝嘅陳加玲樣貌就殘殘哋，同80年代佢喺「開心少女組」個樣真係相差好遠，好在外籍男就唔嫌棄，仲樂意企定定等佢選購化妝品，之後陳加玲就會合男友，二人步入一間男裝店內，陳加玲為男友揀選服飾，又為男友度身，二人有傾有講，睇嚟感情十分穩定，唔知會唔會有喜訊公佈呢？
採訪、攝影：羅德光
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013