英超球隊喺上屆歐聯16強全滅，今屆喜見出現小陽春，4支球隊都順利出線，車仔、曼聯仲拎埋首名，曼城原本都大有機會壓過拜仁拎首名，只不過比歷連尼計錯數。點都好，歐聯嘅英超盛況似乎又出現。
戰友咖喱係曼聯躉，不過連佢都對紅魔歐聯前景嗤之以鼻，小弟當然都唔會儍埋一份，不過車路士同曼城嘅歐聯戰力始終不容忽視。冇錯，小弟係有摩連奴情意結，對佢嘅領軍作風同魅力極為欣賞。佢今季回歸車路士，講真到𠵱家仲處於試陣期，特別喺人才濟濟嘅中場線，都仲未搵到最強組合，不過靠個人質素，已夠排英超前3，歐聯兩度輸畀巴素利，係玩嘢又好真輸又好，冇影響首名出線。摩連奴聲稱下年1月唔會買人，其實中後場都夠晒腳，係前鋒爭少少，費托、伊度奧其實都曾經係歐洲一線射手，只因一個冇信心，一個開始老，先至影響表現，但其實車仔中場侵略性比前鋒更大，費托安心引開對手，反而威力更大。
曼城1月或再增兵
個人對曼城領隊比歷連尼觀感一般，佢嘅餸比車仔更名貴，但暫時味道未夠好；不過財可通神，曼城隨時喺1月一擲千金，再買一批頂尖球員，邊隊對佢都驚。阿仙奴？11月勉強度過死亡月份，仲保住英超榜首，另一個考驗就係明年2、3月，次名出線歐聯16強硬拼強隊，本土聯賽加盃賽連環賽程，到時領隊雲格嘅取捨會係點？以現時嚟睇，雲格始終重聯賽多於歐聯。曼聯？一日由莫耶斯執教，一日都係「算罷啦」！文：牽牛
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24