現年58歲嘅劉家輝兩年前因中風而半身癱瘓，𠵱家身體逐漸康復，大前日佢仲坐住輪椅同好友樊亦敏到中環置地廣場high tea，精神唔錯。
愛食蛋糕遊車河
不過馮仁昭聽聞家輝最近因為同前助手單錢銀官司仲未搞掂而心情好差，每次聽到有關官司嘅事就發晒脾氣，所以班朋友盡可能都唔喺佢面前講單官司。班朋友唔想劉家輝嬲壞身子，想佢放鬆啲，唔好成日留喺老人院，所以近排頻頻陪佢出街食嘢遊車河，諗辦法𠱁佢開心。
劉家輝勁鍾意食蛋糕，一見蛋糕就好開心，基本上認蛋糕唔認人，所以大前日成班朋友本來已經同劉家輝去茶樓飲完茶，但知道佢想食蛋糕，就再同佢去置地high tea食蛋糕，咁啱撞見楊千嬅，千嬅主動問候佢，同佢打氣，又畀咗囝囝張相佢睇，令佢開心番晒。原來日前班好友問劉家輝想去邊度玩同最想做啲乜，結果佢話最想返電視台探吓班同事，以及去電視台canteen食嘢，𠵱家暫定約咗下星期五，冇返電視台咁耐嘅家輝，心情都好期待。
撰文：馮仁昭
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013