去到12月中聖誕漸近，意味來到今季首個高潮，因各支球隊戰罷歐聯分組賽，有兩個月時間回師本土，全力搶分。英超不設歇冬，今年快車期可說提早展開，由周六早場曼城（圖）對阿仙奴揭開序幕，之後尚有熱刺對利記、阿仙奴對車仔、曼城對利記，以及元旦日的曼聯對熱刺的大戰戲碼；佳節當前，不用上班的朋友慶祝完後，約同好友盡情飲幾杯啤酒睇波，人生快事也。來到今季爭標第一道考驗，兵工廠近態卻走下坡，無氈無扇下雲格亦難變，明晚去到曼城無敵主場，料只有被宰份兒，藍月亮上盤出擊。
英超4隊雖同告出線，但曼城及阿仙奴同淪為輸家。前者的比歷連尼計錯數，只爭一球卻仍舊留力，其實以其兵源之廣何需畏首畏尾，若多入幾球痛炒拜仁，相信蒙蘇等高層會更痛快！反觀阿仙奴兵源不足，加上英超賽會安排過份「公平」，踢完周日夜場，周中歐聯作客意國，周六早場匆匆再出，何其蝕底。雲格其實計到盡，並未有冒險用「中堅賓」，繼續讓近期疲態盡現、離門幾碼也失機的基奧特攻堅，並收起今季最fit的艾朗藍斯，以及英軍孖寶韋舒亞及禾確特，希望死守到尾；豈料最後被拿玻里慨贈雙蛋，落得次名出線，而16強無論碰上拜仁、巴塞、皇馬、馬體會或PSG都非易與，好大機會再次是輸波贏口碑。未及回氣，就要來到今季7戰7勝的曼城主場，「兵」敗如山倒似是必然。
紅軍平手拔「刺」
曼城歐洲賽的前路雖同樣難行，但起碼底子厚，1月又有機會大幅增兵，要睇死他們實在太早；而周中留力的阿古路、尼格度、耶耶托尼和高柏尼復出，以逸待勞下疲「兵」輸少過兩球已算有交代。撇除曼城主場勁勢，翻查今季英超早場數據，至今共舉行12場比賽，主隊戰績未算太標青，只錄得5勝3和4負的成績（見附表），但曼城兩度於此時段主場出戰，則錄得2戰2勝，包括強手愛華頓亦輸1:3俯首稱臣。而阿仙奴亦不算輸蝕，兩度作客出擊俱贏，可惜今次對手太強，難再「偷雞」。
兵工廠在不敵拿玻里後，今季首次連續兩場正式比賽不勝，有限兵源下走勢漸老可以預見，相信要待1月狠心增兵才有力爭標；決押曼城讓半/一的上盤，再補4:1、5:1大炒波膽。至於周日英超尾場同是重磅大戰，熱刺缺維頓漢下迎戰同受傷兵困擾、有謝四及史杜列治傷出的利物浦；因主隊後防不成隊型，權衡下要「大」及平手盤的紅軍。文：仙道彬
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24