香港會計師公會今日舉行一年一度股東會，新一屆理事會早幾日率先選出，機管局主席張建東女兒張學欣（Jennifer）首次參選就當票后，票王就係發展局局長陳茂波徒弟兼現任理事林智遠。
雖然會計師公會有3.6萬名會員，但投票選理事嘅人唔多，據聞今年投票人數只超過3,300人，佔會員總數不足一成。今年要由13名候選人當中選出7位，部份爭取連任。
林智遠做票王
林智遠與Jennifer分別取得超過1,840票與1,800票，成為票王、票后。林智遠經常替各類機構主持會計講座，門生眾多，得票多並唔意外。
至於票后Jennifer，好多人認為佢首次參選就有咁多人支持，多少同阿爸張建東有關。張建東1969年就入畢馬威，做到香港及中國畢馬威主席，2003年先至退休。
Jennifer喺2002至2007年亦任職畢馬威，跟阿爸短暫共事，佢之後轉行做賓架，2007至今一直喺匯豐，𠵱家職銜係環球銀行董事。佢喺拉票單張指自己可以替25至35歲嘅年輕人發聲，估計佢都係呢個年齡層。聞說佢仲有中聯辦力撐嘅香港青年聯會幫手拉票。
其他當選理事，包括現任副會長陳美寶、現任理事龔耀輝、港鐵（066）掌櫃羅卓堅、電能（006）掌櫃黃劍文，同埋安永合夥人羅富源。選完理事，公會今日就選會長，首任女會長趙麗娟正式卸任。
李華華
mailto:[email protected]
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24