剛剛上市、而且熱爆全城的垃圾佬，背景自然殊不簡單，股東陣容更絕非泛泛之輩。最值得一讚的，就係垃圾佬夠誠意，肯益散戶，申請越少中籤率越高，化身聖誕老人，提早派禮物，與近期某些同樣人人有份、股價卻即開即插的孤寒鬼相映成趣，佢哋成功掛牌攞到個冧把，都仍然要散戶輸錢。
垃圾佬玩皆大歡喜，讓擺明有錢、又想吸貨的機構投資者，自行在「孖屐」掃貨，策略成功，且為股價造靚個勢，是為IPO之win-win-win典範，來自多家大行的一眾經紀酒腳，全部皆對垃圾佬讚不絕口。
話說「野雞」已經急不及待，搶閘出報告睇5.10元。中國政府最勁之處，係從來唔會為bad loans做write-off，最多都係搞重組，還創造了「資產管理」的新演繹方式。
至於應該如何去秤垃圾，老實說，小妹數口唔精，真係唔識，唔識就要認，所以野雞的目標價，當他是幻想又好、扮科學計算又好，謹記新股萬變不離其宗，其實都係炒供求。
觀乎首天成交已達25億股、過百億元成交金額，被坊間統稱為「基金」的大戶及機構投資者，應該已買得七七八八了，事關邏輯思維，假如閣下係一位「芬佬」，明知垃圾佬將肯定被「大魔頭」納入指數，首日唔追，之後都唔知要用乜嘢價追，孭唔起飛。
東江控股燒冷灶之選
從棺材山地都錄得超額認購，即可知市場資金有多氾濫，陽宅買唔起，陰宅亦都照殺，打新股策略，只拍散拖，得閒嘴嘴，大家happy，總之唔好做人世。港資老牌工業股、全國第二大注塑模具製造商東江控股（2283），5倍PE，產品涵蓋汽車、家電、通訊設備，燒冷灶之選。至於幾時可再入市翻啅，等明年首季見二萬七？本月18、19日十股齊發之後，待資金回籠，都要20號啦！
胡孟青
獨立股評人
足本收睇《亂噏24》x 鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24