【中環遮打道】今次真係陰功豬，心痛死高登班巴打嘞，點解？咪就係劉心悠BB囉，佢前日喺中環拍攝同鄭中基（Ronald）合作嘅電影《奇幻灰姑娘》嘅時候，唔止要打扮到成個師奶咁拋頭露面，仲因為劇情需要，前後連吞咗五個飯盒。
前日下晝1點鐘，心悠BB單拖為部戲喺遮打道開工，佢上身着運動衫，下身配一條三個骨褲，冇點化妝，加埋拖住個家庭傭工、師奶都好鍾意用嘅買餸拖籃，呢個look徹底將佢由女神打落凡間。雖然係咁但都吸引咗唔少人圍觀，當中都有唔少白領男士停步望同影相。
第三Take食慢咗
劇情講述心悠BB拖住個拖籃沿住遮打道走來走去，之後因為太趕連開餐都要企喺個垃圾桶側邊食。見到心悠BB用9秒9時間倒咗個燒味飯盒落肚，之後掉咗個飯盒落垃圾桶。因為要拍唔同角度，所以導演前後拍咗五次，起初一兩次心悠BB都應付自如，吞咗成半個飯盒至掉。但拍到第三次時見佢速度明顯冇之前咁利落，到導演叫cut時佢顯得有啲飽飽滯滯。身邊嘅工作人員仲笑佢冇用，俾人咁話女神自然激氣，即刻攞咗個未食嘅飯盒畀人睇，原來真係好滿，計落五個take大大話話心悠都食咗兩、三個飯盒，仲要劇組啱啱至放完飯，唔知佢要跑幾次至減得番啲卡路里。
劇組前後拍咗個幾鐘至收工，臨上車前問到心悠，佢拍檔Ronald係咪要湊病咗嘅女所以告假，佢就話今日不嬲都冇佢通告喎。
採訪、攝影：馬建華
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013