內地股市走勢麻麻，拖累港股插水405點，市場總有一大堆解釋，例如內地工作經濟會議將明年GDP增長預期，由原來嘅7.5%調低至7%，又美國就業數據靚仔，儲局下星期有機會展開收水旅程。化繁為簡咁睇，基金呢個moment已經收夠籌，holiday mood越嚟越濃，所以趁大市仍然有成交沽貨鎖定利潤，亦無可厚非。
經過呢一跌之後，港股雖未致元氣大傷，但年底要上衝24000機會大減，唐牛因應市況，噚日亦減咗唔少磅，用輕鬆心情迎接2013年餘下嘅交易日。
大市插水，但個別板塊𠵱然唔肯唞氣，噚日輪到土炮零售股發威，Joyce（647）單日喪升逾四成，路邊社消息滿天飛，最誇張嘅傳到會大股東會注入連卡佛，市場想像力相當豐富。正正經經揀一隻零售股買，利信達（738）會係最佳選擇。
其實本欄今年不止一次推介利信達，點解咁like佢？好簡單，因為業績交到功課。集團早前公佈截至11月底止三個月營運數據，自營零售業務總銷售及同店銷售分別增15.2%及14.2%，喺基數越來越高下，有雙位數增長絕對有交代，毛利率更因為折扣率減少而有所提升𠻹！利信達預測市盈率11倍，息率逾四厘夠穩陣，維持中線目標價睇4元不變。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange