編按：是日由盧主席秘書Joycelyn執筆。
「真係㗎？」、「點解嘅？」、「你好叻喔！」，小學生以至「C9」都已經將子華新劇的金句背誦如流，琅琅上口，揶揄港女矯揉造作。不過，試問又有幾多人知道，這三句港女金句是抄襲森美小儀年初舞台劇，這套劇說的正是中女蛻變三部曲。三色台今次又再妙「抄」生輝。
曾幾何時，我們因為政府一男子黑箱作業，不發牌予香港電視，而齊集於政總門外抗議。又曾幾何時，我們不滿大婆台電視節目質素差劣，一齊罷看。如今卻齊齊開電視，又偷偷上myTV煲劇，只為緊貼子華的新劇！彷彿害怕追唔切《My盛Lady》，就找不到閒餘話題。社會意識走勢間中來個大陽燭，然後橫行上落市，難怪隻狼手根本不用舞高弄低，也起不了浪。在香港，要看到政治的堅貞，猶如在夜店覓尋真愛。
泰人的堅持令人敬佩
眾人對眾人之事的堅持，不過三分鐘熱度。在去年10月的政總門外、每年七一的灣仔街道上，我們曾經撕破喉嚨，高聲疾呼。但到了第二天，我們還是如常上班逼地鐵，如常下班開電視，如常以雞汁撈飯。一切如常，回復正軌，冷落得很。港人玩認真，儍的嗎？
真愛是需要付出，有時甚至需要作出犧牲。踩過球場草地並不等於踢過波，難道我睇過雜誌上的Loewe手袋，就等於擁有？那生活多美好呢？政治乃眾之事的道理大家都知道。但在這個所謂的商業掛帥社會，人人精於計算，於是眾事就變成了兩個和尚擔水就等於冇水食的翻版。我們所謂的抗爭，只是一句起的口號、兩句止的段落。所以理所當然地，我們「熄電視」也成了一夜浪漫。
最近姊妹飯局只能約在星期六，原因眾女星期一至五需要留在家睇電視。周六在飯局上，Jennifer一味狂呻自己黑仔，買了旅遊套票去曼谷卻撞正黃衫軍示威，其實我心裏倒有些佩服泰人對政治的熱情與堅持。泰國整個倒政府示威已經維持了將近一個月，試問事件如果發生在香港，你話會有幾多人肯請一個禮拜（莫講一個月）假去示威抗議？就算有都肯定會給上司同事親朋戚友齊問：「儍的嗎？你有一個禮拜年假，去東京shopping或者去布吉陽光海灘好過啦，冇理由儍更更去示威抗議咁浪費咁儍仔。」
就算不需要請假，只是周末紅日偶爾去示威都會換來同一句：「儍的嗎？放假休息下好過啦？咁辛苦出去為乜？有乜着數？」
香港人肯定明白「democracy is not cheap, we have to pay」的道理。不過在家搵晚關一下電視，成本不高，自我感覺良好，已賺咗。再鋪張相上facebook，呃埋likes，賺凸。我們都愛做free rider，頂多以本小利大的心態坐享其成。
政府的政改諮詢已出，佔中亦進入狀態，我衷心希望明年底的運動，已表態支持的很多人（包括我自己）不是口裏說支持，雙腳沒有參與。並希望佔中可動員更多人暫捨利害，且不會淪為裝潮的公餘活動。
我知佔中係嚟真嘅！亦知點解要爭普選！更唔係要人讚叻！謹此明志。
Joycelyn
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24