陳木勝套戲《掃毒》收得，仲帶紅咗泰國最靚嘅變性人Poyd，成為全城熱話，同宜家隻布公仔「路姆西」有得揮。Poyd早幾日嚟咗香港宣傳，佢同好多真女性都一樣，對行街濕平情有獨鍾。前日下晝，佢完成手上工作，趁住仲有一個鐘至去機場，即刻喺尖沙嘴佢住嘅酒店附近行街，唔使10分鐘就簽卡買咗頂帽同太陽眼鏡，咁就已經過萬。
邀紅姑睇戲
Poyd再去到Ralph Lauren，喺櫥窗已經睇中一條晚裝裙，入到舖頭先知道全亞洲得一件，盛惠10萬蚊有找，雖然咁貴，Poyd依然拿拿臨叫店員除咗櫥窗公仔件衫出嚟試，一試就愛不釋手，仲話下次嚟香港宣傳時要着畀古天樂睇喎。當佢想簽卡畀錢嘅時候，先發覺因為買得太多，張卡過唔到數。事實上Poyd本身都有家底，見佢手上個Hermès就知佢買得起有餘，所以佢叫店員幫佢留起，等佢下星期返嚟畀錢攞貨，到時就可以同古仔一齊去戲院宣傳威威。
另外，Poyd仲有奇遇，就係喺舖頭裏面忽然見到紅姑鍾楚紅，交談之間原來紅姑都對Poyd略有所聞，喜出望外嘅Poyd除咗捉住紅姑影相外，當然送咗兩張戲飛畀佢睇戲。
撰文：馮仁昭
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013