會德豐（020）上月底宣佈主席吳光正將於明年1月交棒，由35歲阿仔吳宗權（Douglas）坐正做主席。會德豐旗下會德豐地產噚日開始喺金鐘Wheelock Gallery舉行山頂自然景觀攝影展，吳宗權喺開幕酒會滿場飛，招呼來賓，熱定身做主席。
Douglas一到場就忙住招呼賓客，佢好坦白咁話，未有機會欣賞展出作品。至於開始接手家族生意心情如何？佢就話冇諗咁多，第一個感受就係好忙，幾辛苦，所以都係做好手頭上嘅工作比較重要咁話。雖然係好忙，但係呢次活動推動保育環境，係好事，點都要支持。
講番攝影展，今次會德豐邀請到著名攝影師Edward Stokes，展出14張喺香港山頂拍攝嘅相片，展覽由噚日開始至本月27號，會德豐稍後仲會舉辦攝影比賽同工作坊。
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24