不得民心的CY，又遇着人人得而掉之嘅路姆西出現，令人人紛紛搶公仔。至於今次大贏家一定係IKEA，人流多咗唔使講，路姆民心比CY多N倍。
當路姆西賣到就斷貨時，IKEA玩派籌，盡力做到人人開心；二來回想當日聽到要派籌，人人都話「唔係呀化？」，明顯IKEA成功令熱潮白熱化。至於IKEA應付官方fb留言時，不但反應快，而且多次強調買其他公仔都可以做善事，大方得體，相信佢哋fb呢兩日應該多咗唔少fans。路姆西熱剛過高潮，最新消息就話IKEA會幫隻公仔改名，呢個timing可以話係啱啱好。
有謂唔怕生壞命，最怕改壞名。Marketing講product naming嗰課書，都有講改名似粗口係死罪，今次IKEA就成功轉危為機。不過大企業好多時搞全中國推廣時，都忽略唔同方言，結果鬧出笑話，最新就見Olay內地新男士系列推廣活動，宣傳口號竟然係「尋找中國勁能樣」，雖然Olay有解釋乜嘢叫「勁能樣」，但好難相信廣東人見到呢個宣傳唔會大笑。
就算喺所有香港人嘅心目中，隻公仔以後都叫路姆西，佢都只係一隻公仔。之不過，試諗吓，當買Olay嘅產品時，就諗起「勁能樣」嘅時候，真係都唔知買唔買好嘞。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange