長和系主席李嘉誠加強總部中環長江中心嘅保安，陸續喺兩個電梯大堂安裝入閘機，即係好似中環國金，喺樓上返工嘅員工要拍卡先可以上樓，訪客就一定要登記。不過入閘機𠵱家仲未完全裝好，得個樣！
長江中心1999年落成啟用，大堂守衞以前唔算森嚴，普通人都幾易上落。中環八卦友估計，超人加閘應該同今年初碼頭工人示威工潮有關，當時有20名學聯同左翼廿一成員，成功喬裝到達長江中心7樓，即長實（001）總部寫字樓抗議。
據講，長江中心之後開始加強保安，所有人要排隊出示證件先至可以乘電梯上樓。有喺長江中心返工嘅老友話，見過長實董事甘慶林、葉德銓、趙國雄排隊乘電梯，佢哋位位要員兼年薪超過2,000萬元都要守規矩。
為長遠計，長江中心早排開始安裝入閘機，地下同上一層嘅電梯大堂都裝晒，出入要拍卡。
租戶證監會亦受惠
不過高盛員工暫時唔受影響，因為高盛租用長江中心68樓，所用電梯設於地下大堂另一端，嗰邊嘅電梯主要上59至70樓，70樓是超人寫字樓，路口位幾窄，兼且長期坐住兩、三名保安員，暫時唔見有安裝入閘機。
其實長江中心加強保安都無可厚非，唔計碼頭工人示威同佔領中環，證監會呢個新租戶，今年初正式由遮打大廈搬過去。早幾年證監會因迷債事件，搞到遮打大廈外經常有示威者抗議，𠵱家搬到長江中心，超人點都要諗計防備吓嘅。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange