港股圓頂派貨後急插，圖表形成島形頂，如日內大裂口下跌，見頂風險將大增，昨已在fb建議減倉，特別是近期熱炒的二三線濠賭股及環保股。恒指失守11月大裂口底部，有近七成藍籌已失守該防線，形勢不妙，加上近月一見大陰燭，短期都冇運行，目前就算不離場觀望，亦應稍作減持。
睇開本欄的戰友都知，魏力作戰方針一向係「追破頂，不撈底」，咁係咪任何情況下都不能撈？當然不是。廣船（317）昨急插至14.3元拗腰勁彈，埋單16.3元，低位彈足兩蚊。昨文有提及，如調整黃金比率0.382倍，可低見14.6元，有計數為基礎，當其反彈至15蚊時，就是撈底的好時機，因見底訊號經已出現。
順龍控股（361）昨炒高一成，成交急增，似想有一番搞作。魏力睇過條數，發現甚有賣盤條件，業績亦正在改善，是逆市冷敲的選擇之一。順龍主攻高球用品產銷，業務簡單乾淨，市值僅2.2億元。今年上半年業績翻身，多賺1.4倍至628萬元，營業額大增29%，相當靚仔，現時PB僅0.7倍，估值偏低。5月份售增城廠房，套現近3,500萬元，令負債顯著下降，似有「淨身」賣殼的味道。
睇埋走勢，橫行五個月後，昨大成交突破一年高位，似為春江鴨進場，RSI及MACD均呈升勢，齋睇圖都值得小注一炒。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange