英皇證券（717）上星期公佈靚爆業績後連日向下，噚日終於重拾生氣，逆市搶高9%，再次逼近圓底頸線0.44元，證明早前回吐係趁好消息出貨，派對尚未完結，一旦升穿頸線，量度升幅可見0.55元，潛在升幅29%！
達標難度有幾大？先從基本因素出發︰截至9月底止，撇除應收貸款撥備後，英皇證券全年賺1.64億銀，按年勁升117%，受惠股市暢旺，配售與包銷業務收入狂升2.4倍至1.4億銀，佔比最大嘅貸款業務收入，亦升91%至1.8億銀。普遍預期美國最快下季先退市，股市氣氛只會越嚟越熱烈，英皇證券肯定豬籠入水。
睇估值，英皇證券現價市盈率7.1倍，比起同業耀才證券（1428）嘅14.9倍，大幅折讓52%，市賬率0.8倍，更較耀才嘅2.1倍折讓62%，加上有逾4厘息墊底，可以用三個字嚟總結︰平靚正！
值得留意嘅係，英皇證券大股東楊氏家族，今年有鋪增持股份癮，相信亦係股價能夠跑大市嘅原因（英皇證券今年累升25%，恒指僅升5%）。
放榜過後，新一輪增持攻勢一觸即發，有強大資金做後盾，英皇證券肯定易升難跌，還是趁大股東出手前，趕快入場吧。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange